অসম তথা সমগ্ৰ উত্তৰ পুৰ্বাঞ্চলৰ ছাত্ৰ-ছাত্ৰীসকলৰ সুবিধার্থে ন্যায্য তথা কম খৰচত উন্নত আৰু গুণগত মানদণ্ডৰ শিক্ষাদানৰ ব্যৱস্থা কৰি অহা এক অগ্ৰণী শিক্ষা প্ৰতিষ্ঠান চি.ই.চিয়ে সাফল্যৰ দ্বাত্ৰিংশ বৰ্ষত প্ৰদাৰ্পণ কৰিলে৷ অসমৰ এক থলুৱা প্ৰতিষ্ঠানৰ এই ইৰ্ষণীয় সফলতাৰ আঁৰৰ ব্যক্তিজনেই হ’ল চি.ই.চি. (কম্পিউটাৰ এডুকেশ্যন চেণ্টাৰ)ৰ প্ৰতিষ্ঠাপক সভাপতি দীপাংকৰ দত্ত৷ ১৯৯৪ চনৰ মে’ মাহৰ দুই তাৰিখে অসমৰ শিক্ষাক্ষেত্ৰত এক যুগান্তকাৰী উল্লেখনীয় স্থানপ্রাপ্ত শিক্ষানুষ্ঠান চি ই চি য়ে আত্মপ্ৰকাশ কৰিছিল। সেই সময়ৰ প্ৰেক্ষাপটত কাৰিকৰী শিক্ষাৰ প্ৰতি আগ্ৰহ থকা বহুতেই কম্পিউটাৰ আৰু ইয়াৰ স’তে জড়িত আনুষংগিক কিছু বিষয়ৰ জ্ঞান আহৰণ কৰাৰ ক্ষেত্ৰত পর্যাপ্ত মানদণ্ডৰ শিক্ষানুষ্ঠানৰ অভাৱত থমকি ৰবলৈ লগা হৈছিল৷ এই প্রয়োজনৰ কথা মনত ৰাখিয়েই গুৱাহাটীৰ উদ্যোগী যুৱক দীপাংকৰ দত্তই প্রায় একক প্রচেষ্টাৰেই চি ই চিৰ ভেটি গঢ় দিছিল। সেয়াই আৰম্ভণি, তাৰ পিচৰে পৰাই চি ই চিয়ে নিৰৱিচ্ছিন্ন ভাৱে অসম তথা উত্তৰ পুৰ্বাঞ্চলৰ কাৰিকৰী তথা বৃত্তিমূলক শিক্ষাৰ প্ৰতি আগ্ৰহী সকলক শিক্ষা প্ৰদানৰ বিষয়টো এক দ্বায়িত্ব হিচাপে লৈ আজিলৈকে সুচাৰুৰূপে কাম কৰি আহিছে।
চি.ই.চি.ৰ প্ৰতিষ্ঠাপক দীপাংকৰ দত্তৰ বিৰামহীন প্ৰচেষ্টা আৰু নিখুঁত পৰিকল্পনাৰ ফলস্বৰূপে এই শিক্ষা প্ৰতিষ্ঠানটো আজি উন্নয়নৰ উচ্চ শিখৰত অৱস্থিত হবলৈ সক্ষম হৈছে ৷ দুটা কম্পিউটাৰেৰে আৰম্ভ কৰা এই প্ৰতিষ্ঠানটো আজি সমগ্ৰ উত্তৰ পূৰ্বাঞ্চলৰ এক উন্নত মানদণ্ডৰ প্ৰতিষ্ঠানৰূপে পৰিগণিত হৈছে ৷
সকলোৱে সপোন দেখে আৰু সকলোৰে অৱচেতন মনত সেই সপোন পূৰণৰ হেঁপাহ এটাইও অহৰহ ক্ৰিয়া কৰি থাকে। কিন্তু সেই সপোন বাস্তৱ কৰাৰ সংগ্রাম সহজ নহয় ; বিশেষকৈ অসমত নিজাকৈ কিবা এটা কৰাৰ পৰিবেশ অতি সুচল বুলি এতিয়াও ক’ব পৰা হোৱা নাই। ভাৰতৰ অন্য ৰাজ্যত ব্যৱসায়ীসকলে যি সুযোগ-সুবিধা পাই আছে সেয়া অসমত বৰ্তমানলৈকে উপলব্ধ হোৱা নাই। গুজৰাট, দিল্লী, ৰাজস্থান আদি অঞ্চলৰ ব্যৱসায়ীসকলে যি সামাজিক সন্মান লাভ কৰে তেনে এক অৱস্থা অসমত পাবলৈ হ’লে বহু সংগ্রাম কৰিবলগীয়া হয়। কিন্তু এনে এক ভাৰসাম্যহীন অৰ্থনৈতিক তথা সামাজিক পৰিস্থিতিক প্ৰত্যাহ্বান হিচাপে লৈ দীপাংকৰ দত্তদেৱে কাৰ্যকুশলতা আৰু সততাকে মুলধন হিচাপে লৈ এই শিক্ষা প্ৰতিষ্ঠানটোক আজিৰ পৰ্য্যায়লৈ উন্নীত কৰিবলৈ সক্ষম হৈছে৷ এই ক্ষেত্ৰত ১৯৯৪ চনৰ পৰা বৰ্তমানলৈ অসম তথা উত্তৰ-পুৰ্বাঞ্চলৰ অলেখজনৰ সপোন পূৰণৰ সংগ্ৰামত জড়িত হৈ সৌগৰৱে নিজৰ অৱস্থিতিৰ কথা প্ৰমাণ কৰা এই প্ৰতিষ্ঠানৰ মুৰব্বী প্ৰতিষ্ঠাপক দত্তদেৱৰ কাৰ্য্যকুশলতা তথা অধ্যৱসায়েই হৈছে এই সাফল্যৰ আঁৰৰ কথা।
বর্তমান যুগত ক্ষীপ্ৰভাৱে বিকশিত হোৱা বিজ্ঞান আৰু প্ৰযুক্তি বিদ্যাৰ যথাযথ ব্যৱহাৰিক শিক্ষা বৰ্তমানৰ সমাজৰ সকলো শ্ৰেণীৰ লোকৰ বাবে যথেষ্ঠ গুৰুত্বপুৰ্ণ হৈ পৰা পৰিলক্ষিত হয় ৷ ছাত্ৰ-ছাত্ৰীৰ উপৰিও শিক্ষক, ব্যৱসায়ী, গৃহিনী, কৰ্মচাৰী, জ্যেষ্ঠ নাগৰিককে আদি কৰি সমাজৰ প্ৰতিটো স্তৰৰে লোকৰ বাবে কম্পিউটাৰ শিক্ষা যথেষ্ঠ গুৰুত্বপুৰ্ণ হৈ পৰা দেখা গৈছে ৷ আজিৰ দিনত কম্পিউটাৰ শিক্ষাৰ বহুল প্ৰচাৰ হ’লেও দুই দশক পুৰ্বে অসমৰ শিক্ষাজগতখন কম্পিউটাৰ শিক্ষাৰ ক্ষেত্ৰত বহু পিছপৰি আছিল । কম্পিউটাৰ যন্ত্ৰটোক বিজ্ঞানৰ এক বিস্ময়কৰ সৃষ্টি বুলি একাংশৰ মনত ধাৰণা আছিল। আনকি সাধাৰণ মানুহে কম্পিউটাৰ চুবলৈকে ভয় কৰিছিল। তেনে পৰিস্থিতিত অসমৰ ছাত্ৰ-ছাত্ৰীসকল দেশৰ আন আন অঞ্চলৰ ছাত্ৰ-ছাত্ৰীৰ তুলনাত বহুখিনি পিছপৰি থাকিবলগীয়া হৈছিল বা প্ৰতিযোগিতাত সমানে সমানে খোজ মিলাব পৰা নাছিল।
এসময়ৰ অসম আন্দোলন তথা সদৌ অসম ছাত্ৰ সন্থাৰ সৈতে ওতঃপ্ৰোতভাৱে জড়িত দীপাংকৰ দত্তই অসমৰ নিবনুৱা সমস্যাৰ ভয়াবহতাক গভীৰভাৱে হৃদয়ঙ্গম তথা ইয়াৰ সমাধানৰ প্রতি আগ্ৰহী হৈ পৰে। সেই উদ্দেশ্যে তেওঁ ১৯৯০ চনত কম্পিউটাৰৰ উচ্চশিক্ষা গ্ৰহণৰ বাবে নতুন দিল্লীলৈ যায়। দত্তদেৱে দিল্লীত কম্পিউটাৰ বিষয়ত শিক্ষাগ্ৰহণ কৰাৰ সময়তে অসমতো তেনে ধৰণৰ আধুনিক তথা প্ৰয়োজনীয় কাৰিকৰী বিষয়ত কম্পিউটাৰ শিক্ষাৰ প্ৰচাৰ আৰু প্ৰসাৰৰ কথা চিন্তা চৰ্চা কৰা আৰম্ভ কৰিছিল৷ নতুন দিল্লীত কম্পিউটাৰ শিক্ষাত পূর্ণতা আৰু দক্ষতা লাভ কৰি দীপাংকৰ দত্তদেৱে গুৱাহাটীলৈ ঘূৰি আহি নুনমাটি অঞ্চলত চি.ই.চি. নামৰ এটা ক্ষুদ্ৰ কাৰিকৰী শিক্ষা-প্ৰতিষ্ঠানৰ যোগেৰে এক পৰিকল্পিত যাত্ৰাৰ শুভাৰম্ভ কৰে। কম্পিউটাৰ শিক্ষাৰ প্ৰসাৰৰ যোগেদি অসমক প্ৰগতিৰ দিশলৈ আগুৱাই নিয়াৰ সেই হেঁপাহৰ বীজটোৱে এসময়ত এটা সপোনলৈ গজালি মেলিছিল৷ এনে এক সপোনৰে আঁত ধৰি ১৯৯৪ চনত আৰম্ভ হ’ল কম্পিউটাৰ এডুকেচন চেন্টাৰ (চি ই চি)। ইয়াৰ লগতে আছিল গভীৰ আত্মবিশ্বাস। মাথো দুটা কম্পিউটাৰেৰে আৰম্ভ কৰা এই তিনি দশকজোৰা সপোন এটা পূৰণৰ সংগ্রাম সংগ্ৰামখন এতিয়া অসমৰ তথা উত্তৰপূবৰ ১৭৫ টা চিইচিৰ শাখালৈ উন্নীত হৈছে৷ এই শাখাসমূহৰ ভিতৰত অকল গুৱাহাটী মহানগৰীতেই এতিয়ালৈকে ৩৫ টা শাখা আছে।
চি.ই.চি.য়ে গৌৰবোজ্জল ৩১ বছৰ সম্পূর্ণ কৰি অসমৰ কাৰিকৰী শিক্ষাৰ ইতিহাসত যথেষ্ঠ গুৰুত্বপুৰ্ণ অৱদান তথা নিৱনুৱাৰ সংস্থাপনত গুৰুত্বপূর্ণ ভূমিকা লিপিৱদ্ধ কৰি অহা কথাটোৱেই এই প্ৰতিষ্ঠানটোৰ কৃতিত্বৰ বাতৰি দিছে । এতিয়ালৈ চি. ই.চি. প্রতিষ্ঠানত শিক্ষা গ্রহণ কৰি ৫,০০,০০০ত কৈও অধিক ছাত্ৰ-ছাত্রীয়ে জীৱনৰ ভেটি সুদৃঢ় কৰিবলৈ সক্ষম হৈছে। ৩,০০,০০০ তকৈও অধিক ছাত্র-ছাত্রীয়ে কম্পিউটাৰৰ মনঃপূত পাঠ্যক্ৰমৰ সফল সামৰণি মাৰি বিভিন্ন বহুজাতিক কোম্পানী, চৰকাৰী-অর্ধচৰকাৰী তথা বেচৰকাৰী প্রতিষ্ঠানত সংস্থাপন লাভ কৰি জীৱন নির্বাহ কৰিবলৈ সুযোগ লাভ কৰিছে।
বৰ্তমানলৈ সমগ্ৰ উত্তৰ-পূৰ্বাঞ্চলৰ বিভিন্ন অঞ্চলত অৱস্থিত চি.ই.চি.ৰ ১৭৫ ৰো অধিক শাখাত অভিজ্ঞ প্ৰশিক্ষকৰ তত্বাৱধানত কম্পিউটাৰ ছফটৱেৰ, হাৰ্ডৱেৰ, মাল্টিমিডিয়া, নেটৱৰ্কিং, একাউনটেন্সি, ফেশ্বন ডিজাইনিং, ইন্টেৰিঅ’ৰ ডিজাইনিং, জাৰ্ণেলিজম, টুৰিজম, বিউটিচিয়ান, ডিজিটেল মাৰ্কেটিং, এডিটিং, স্প’কেন ইংলিছকে আদি কৰি বহু কাৰিকৰী তথা বৃত্তিমুলক পাঠ্যক্ৰম প্ৰদান কৰা হৈ আহিছে ৷
উল্লেখনীয় যে অসম তথা উত্তৰ-পূৰ্বাঞ্চলত কম্পিউটাৰ শিক্ষাৰ সম্প্রসাৰণ আৰু প্রয়োগিক দিশত অধিক কাৰ্যকৰী হোৱাৰ ওপৰত গুৰুত্ব প্রদান কৰিয়ে এই অনুষ্ঠানটো গঢ়ি তোলা হৈছিল। এই প্ৰচেষ্টাৰ ফলস্বৰূপে প্রতিষ্ঠানটোৰ উন্নতমানৰ গুণগত শিক্ষাপদ্ধতিয়ে ছাত্র-ছাত্রী, অভিভাৱকসকলক আকৃষ্ট কৰাৰ লগতে বৰ্তমান জনপ্রিয়তাৰ শীর্ষত আৰোহণ কৰিবলৈ সক্ষম হোৱাটো অতিকৈ গৌৰৱৰ বিষয়।
১৯৯৪ চনত ৰোপণ কৰা এটি গছপুলি যেন লহপহকৈ বাঢ়ি আজি এডাল প্রকাণ্ড বৃক্ষত পৰিণত হৈছে। বৃক্ষৰ বিস্তাৰিত ডালৰ দৰে সমগ্র উত্তৰ-পূৰ্বাঞ্চল ব্যাপি থকা চি.ই.চি.ৰ ১৭৫ ৰো অধিক শাখাই কম্পিউটাৰ তথা আন আন বৃত্তিমুলক পাঠ্যক্ৰমৰ শিক্ষা প্রদানেৰে শিক্ষাৰ্থীসকলক সামাজিক, অৰ্থনৈতিক দিশত সচেতন কৰা আৰু বিভিন্ন ক্ষেত্ৰত সংস্থাপিত বা স্বনিৰ্ভৰশীল হৈ উঠাত গুৰুত্বপূর্ণ ভূমিকা ল’ব পাৰিছে।
চি.ই.চিৰ শিক্ষাপ্ৰণালীৰ উন্নত গুণগত মানদণ্ডৰ বাবে বহু শিক্ষাৰ্থীয়ে কাৰিকৰী শিক্ষাগ্ৰহণৰ বাবে চি.ই.চি.ৰ গুৱাহাটীৰ শিলপুখুৰীস্থিত মুখ্য কার্যালয় বা উত্তৰপূবৰ বিভিন্ন অঞ্চলত সিচঁৰতি হৈ থকা শাখা কার্যালয়সমূহত নামভৰ্তিৰ বাবে আবেদন কৰিবলৈ ভিৰ কৰা পৰিলক্ষিত হয়। ইয়াৰ বাবে যোৱা তিনিটা দশক সহস্ৰজনৰ বিশ্বাসকে মূলধন হিচাপে লৈ শিক্ষা প্ৰদান কৰা এই অগ্রণী প্রতিষ্ঠানটোৰ প্ৰতিষ্ঠাপক তথা এই শৈক্ষিক বিপ্লবৰ সৈতে জড়িত থকা প্ৰতিজন ব্যক্তিয়েই ধন্যবাদৰ পাত্ৰ ৷ সাম্প্ৰতিক কালত উত্তৰ-পুৰ্বাঞ্চলস্থিত এনে উন্নতমানৰ শিক্ষা প্ৰতিষ্ঠানৰ বাবে বহিঃৰাজ্যলৈ শিক্ষা লাভৰ বাবে যোৱা ছাত্ৰ-ছাত্ৰীৰ সংখ্যা কমি অহাটো পৰিলক্ষিত হৈছে ৷ আন অৰ্থত অসমৰ ৰাজহ অসমতে থকা অৱস্থা এটাই ৰাজ্যখন অর্থনীতিৰ দিশটো সবল কৰাৰ ক্ষেত্ৰত কিছুপৰিমানে হলেও সহায় কৰিছে ৷
বৰ্তমানৰ প্ৰযুক্তিবিদ্যাৰ উত্তৰণৰ সময়ত শৈক্ষিক দিশসমূহত পুংখানুপুংখভাৱে যথেষ্ঠ লক্ষ্য ৰখা এই প্রতিষ্ঠানটোৱে ৩০টা ডিপ্লমা আৰু আন আন ২৬ টা হ্রস্বকালীন পাঠ্যক্রম পৰিচালনা কৰে। চি.ই.চি. কেন্দ্ৰসমূহে পৰিচালনা কৰা গুৰুত্বপূর্ণ পাঠ্যক্ৰমসমূহৰ ভিতৰত কম্পিউটাৰ এপ্লিকেশ্যন, কম্পিউটাৰ এছেমব্লিং এণ্ড মেইনটেনেন্স, ছমহীয়া ছফটৱেৰ আৰু হাৰ্ডৱেৰ ইঞ্জিনীয়াৰিং, এবছৰীয়া কম্পিউটাৰ ছফটৱেৰ এপ্লিকেশ্যন আৰু দুবছৰীয়া কম্পিউটাৰ ইঞ্জিনীয়াৰিং এণ্ড ই-কমার্চ । ইয়াৰ উপৰিও হাৰ্ডৱেৰ, মাল্টিমিডিয়া, নেটৱৰ্কিং, একাউনটেন্সি, ফেশ্বন ডিজাইনিং, ইন্টেৰিঅ’ৰ ডিজাইনিং, জাৰ্ণেলিজম, টুৰিজম, বিউটিচিয়ান, স্প’কেন ইংলিছকে আদি কৰি বহুকেইটা বিষয়ত হ্ৰস্বকালীন আৰু ডিপ্ল’মা পাঠ্যক্ৰম প্ৰদান কৰা হয় ৷
শিলপুখুৰীৰ মহর্ষি বিদ্যামন্দিৰ বিদ্যালয়ৰ সমীপত অৱস্থিত চি ই চিৰ মুখ্য কাৰ্যালয়ৰ পৰা অসম তথা উত্তৰপুবৰ চুকে কোণে থকা শাখা সমুহলৈ প্ৰয়োজনীয় দিহা পৰামৰ্শ বা কাৰিকৰী প্ৰশিক্ষণৰ বাবে লাগতিয়াল সহায় প্ৰদান কৰা হয় । চিইচিৰ প্ৰতিটো শাখাতে অত্যাধুনিক সা-সৰঞ্জাম তথা কম্পিউটাৰ সম্বলিত লেব’ৰেটৰীয়ে প্রশিক্ষাৰ্থীসকলক বহুল পৰিমাণে উপকৃত কৰিব পৰাটো লক্ষ্যনীয়।
এইখিনিতে উল্লেখযোগ্য যে চি.ই.চি.য়ে অসমৰ সামাজিক ক্ষেত্ৰখনলৈকো বিভিন্ন সময়ত প্ৰভুত পৰিমাণে বৰঙণি আগবঢ়াই আহিছে৷ প্রতিষ্ঠানটোৱে সকলো ছাত্র-ছাত্রীৰ সুবিধার্থে ন্যায্য, কম খৰচত উন্নত আৰু গুণগত মানদণ্ডৰ শিক্ষাদানৰ ব্যৱস্থা কৰি অহাৰ লগতে ভৱিষ্যতেও এই প্রচেষ্টা অব্যাহত থাকিব। আর্থিক দিশত দুর্বল ছাত্র-ছাত্রীক সহানুভূতিশীলভাৱে বিনামূলীয়া পাঠ্যক্ৰমৰ ব্যৱস্থা ৰখা হৈছে ।
চৰকাৰী বা বেচৰকাৰীভাৱে এতিয়ালৈকে কোনো অৰ্থসাহায্য নোলোৱাকৈ এই প্ৰতিষ্ঠানটোৰ প্ৰতিষ্ঠাপক দীপাংকৰ দত্তই উত্তৰ-পূৰ্বাঞ্চলত কম্পিউটাৰ শিক্ষাৰ প্ৰসাৰ আৰু জনমুখী কৰি তোলাৰ ক্ষেত্ৰত আগবঢ়োৱা বৰঙণিৰ কথাও এইখিনিতে উল্লেখযোগ্য৷ শ্ৰীযুত দীপাংকৰ দত্তই কম্পিউটাৰ শিক্ষাৰ প্রসাৰ আৰু বৃত্তিমূলক শিক্ষাৰ ব্যৱহাৰিক দিশৰ সফলতা লাভ কৰি ব্যৱসায়িক দিশত উন্নতি লাভ কৰা সফল অসমীয়া ব্যৱসায়ী হিচাপে পৰিগণিত হৈছে৷ শ্ৰীযুত দত্তৰ দ্বাৰা পৰিচালিত এই প্ৰতিষ্ঠানত ছাত্ৰ-ছাত্ৰীৰ শিক্ষাৰ ক্ষেত্ৰত গ্ৰহণ কৰা সততা তথা সৰ্বাত্মক আপোচবিহীন মনোভাৱৰ বিষয়টো অভিভাৱকসকলে অতি প্ৰশংসনীয় বুলি অভিহিত কৰিছে৷
অসম তথা উত্তৰপুৱৰ প্ৰধান সমস্যাৰূপে পৰিগণিত হোৱা নিবনুৱা সমস্যাৰ সমাধানৰ ক্ষেত্ৰতো শ্ৰীযুত দীপাংকৰ দত্তই গ্রহণ কৰা পদক্ষেপ যথেষ্ঠ সময়োচিত বুলি ক’ব লাগিব। চৰকাৰী কার্যালয়েই হওঁক বা ব্যক্তিগত খণ্ডৰ প্রতিষ্ঠানেই হওঁক প্রতি পাঁচজন কৰ্মচাৰীৰ মাজত একোজনকৈ হলেও চি.ই.চি. প্ৰতিষ্ঠানত প্রশিক্ষিত যুৱক-যুৱতী থকাটো পৰিলক্ষিত হয় ৷ এয়া এক সন্তোষজনক কথা, যাৰ বাবেও চিইচি প্ৰতিষ্ঠানটি বহুতৰে ধন্যবাদৰ পাত্ৰ হৈছে ৷
পাঠ্যক্ৰমসমূহৰ সৈতে সংগতি ৰাখি সময়ে সময়ে চি ই চিৰ মুখ্য কাৰ্য্যালয়ৰ লগতে বিভিন্ন শাখাসমূহেও বিভিন্ন বিষয়ক কর্মশালা, ফেশ্বন শ্ব’, শিক্ষা বিষয়ক কৰ্মশালা, প্ৰদৰ্শনী আদি অনুষ্ঠিত কৰি আহিছে। চি ই চিৰ বিভিন্ন শাখাসমূহত ছাত্ৰ-ছাত্ৰীসকলৰ অধ্যয়নৰ বাবে অতীব প্ৰয়োজনীয় গ্ৰন্থাগাৰ তথা অত্যাধুনিক শিক্ষণ সজুলি বা সা-সামগ্ৰীৰে উত্তৰ পূবৰ শিক্ষা আৰু নিয়োগৰ ক্ষেত্ৰত এক নতুন অধ্যায়ৰ সূচনা কৰাত আগভাগ লোৱা পৰিলক্ষিত হৈছে ৷
বৌদ্ধিক বহিৰ্গমন ৰোধ কৰাৰ বাবে লোৱা চিইচিয়ে গ্ৰহণ কৰা ব্যৱস্থাসমুহে ইতিমধ্যে বহুতকে আকৰ্ষণ কৰিবলৈ সক্ষম হৈছে৷ উচ্চ শিক্ষা লাভৰ বাবে প্রতি বছৰে অসমৰ অধিকসংখ্যক ছাত্ৰ-ছাত্রী অসমৰ বাহিৰলৈ যায়। এইক্ষেত্ৰত অভিভাৱকসকলক এক মোটা অংকৰ ধনৰ প্রয়োজন হয়। মধ্যবিত্ত শ্রেণীৰ লোকসকলৰবাবে এনে উচ্চ হাৰত ধন খৰচ কৰাটো সম্ভৱ নহয়। অসমৰ বহিৰত থাকি পঢ়া প্ৰক্ৰিয়াটো যথেষ্ট ব্যয়বহুল। কিয়নো শিক্ষাৰ মাচুলৰ উপৰি থকা-খোৱা-লোৱাতো যথেষ্ট খৰচ হয়। সেয়েহে ছাত্র-ছাত্রীৰ বাবে চিইচিৰ প্ৰশিক্ষণ কেন্দ্ৰবোৰো অত্যাধুনিক সা-সুবিধা, উপযুক্ত আন্ত:গাঁথনি তথা দক্ষ প্ৰশিক্ষকৰ ব্যৱস্থা কৰাৰ প্ৰচেষ্টা কৰা হৈছে যাতে অসমৰ ছাত্ৰ-ছাত্ৰীয়ে অসমতে থাকি বাহিৰৰ প্ৰতিষ্ঠানৰ দৰে উন্নতমানৰ শিক্ষা লাভৰ সুবিধা লাভ কৰে।
চিইচিৰ প্ৰতিষ্ঠাপক শ্ৰীযুত দীপাংকৰ দত্তৰ মতে – “সপোন পূৰণৰ হেঁপাহ থাকিলে সংগ্রাম কৰাটো যেন হৈ পৰে আনন্দৰ কষ্ট। নি:সন্দেহে অসম তথা উত্তৰ পুৰ্বাঞ্চল নানা সমস্যাৰে ভাৰাক্ৰান্ত ৷ শৈক্ষিক ক্ষেত্ৰখনো তাৰ পৰা মুক্ত নহয় ৷ ব্যৱসায়ৰ ক্ষেত্ৰত থকা সমস্যাৰ কথা নকলোৱেই বা । সেইবুলি হাত সাবটি বহি থকাতকৈ নিজ সামর্থ্যৰে প্রথমে নিজা ঘৰৰ পৰাই সপোন পূৰণৰ সংগ্রাম কৰিলে প্ৰতীক্ষিত ফল লাভ কৰাটো একো অসম্ভৱ কথা নহয় ৷ নিজৰ কামক সৰু বুলি ভবাটো এক দোষ। নিজৰ কামক সন্মান জনাব পাৰিলেহে জীৱনত উন্নতি কৰাটো সম্ভৱ ৷ এতিয়া দেখা গৈছে যে বৰ্তমান সময়ত অসমীয়া যুৱক-যুৱতীৰ মনত ব্যৱসায়ৰ প্ৰতি আগতে থকা ধাৰণা সলনি হৈছে। বহুতেই নিজাকৈ কিবা এটা কৰিবলৈ আগবাঢ়ি আহিছে। আগৰ দৰে ব্যৱসায় কৰাৰ ক্ষেত্ৰত প্ৰত্যক্ষ কৰা দ্বিধাবোধ নোহোৱা হৈছে। বহুজনে নিজে বিভিন্ন ব্যৱসায়িক ক্ষেত্ৰত কৰা অধ্যৱসায় আৰু নিষ্ঠাৰে কৰা কষ্টৰ ফলত নিজৰ সপোন পূৰণৰ লগতে আন দহজনকো সপোন দেখিবলৈ শিকাইছে, ব্যৱসায়িক ক্ষেত্ৰত সংগ্ৰাম কৰিবলৈ সাহস দিছে। এয়া নি:সন্দেহে অতি আনন্দৰ বতৰা ৷”
☆ ★ ☆